...G Y B U R S T A G...

...czyli URODZINY

Pamiyntom tyn fajer
Loła sie gorzałka
Jak Francik hajer
Kopyrtnył ze stołka

Złaziły sie kamraty do familoka
Na cołki karpynter
Szlagry grały z radyjoka
A balonami łobmojony był gelynder

Wielgo dorta upiykła Krista
Były ciostka, bombony, inksze maszkety
Do popicio biru kista
Potym na zagrycha szałot i kotlety

Wydziwiali, tańcowali - ło pioronie!
Ludzi buła w kożdyj izbie
Nawet we antryju, na balkonie
Ciynżko sie pochytać w takij ciżbie

Kole piontyj nad ranem
Ftoś zaklupoł na dźwiyrze
Jo wejrzoł bez kulkok
Policyjo!!! Rzykejcie paciyrze

Kozali ściszyć ta lajera
Bo spać niy poradzom somsiady
Muszymy tak zrobić
Niy chca żodnyj zwady

Wszyjscy zmynczoni
Poleku sie tracom
Wzionech sie za sprzontani
Lotom gipko z tacom

Bajzel skuli tego świyntowanio
Aże przikro zaglondać
Chałpa zmiyniyła sie niy do poznanio
Trza tu jakigoś rozwionzanio!!!

***

Nastypny gyburstag bydzie w lokalu
Fest se chop przikozoł
Niy byda sie musioł ło nic starać
Yno łod jutra byda szporowoł

autor

cubus

Dodano: 2007-03-21 00:18:26

Ten wiersz przeczytano 1535 razy

Oddanych głosów: 10

Rodzaj Rymowany Klimat Radosny Tematyka Urodziny

Aby zagłosować zaloguj się w serwisie