Małpica - psotnica
W chorzowskim zoo żyła małpica,
wielko z niyj była psotnica i śmiyszka,
wszystkim naokoło wyprowiała wica:
słoniowi wraziyła roz do tromby szyszka.
Jak słoń dmuchnył we swoja tromba,
bo go w pojstrzodku fest załechtało,
szyszka strzelyła, jak jako bomba,
aż sie misiowi w zadek dostało.
Od tego strzału pod, jak niyżywy,
tak, choćby trefiył go jaki szlag,
wpod przi tym biydny misio w pokrziwy,
doszoł do siebie po sztyrech dniach.
Inkszym zaś razym nasuła lwowi
soli do żarcio, całe piynć kilo,
niż tyn sie kapnył, o co sam chodzi,
onyj już downo przi tym niy było.
Wielki ryk zbudziył roz zoo rano,
tak strasznie dar sie tygrysek młody,
sznurka za ogon mioł prziwionzano,
wyloł se na łeb poł kibla wody.
Sowa sie zdrzymła bez dziyń na stromie
toż ji małpica zebrała bryle,
potym szukała te bryle w kromie,
bez cołki tydziyń, aż do niedziele.
W końcu zrobiyli w zoo narada,
jak przed małpicom majom sie bronić,
trza sie jom pozbyć - jedyno rada,
toż jom ze zoo trzeba wygonić.
Małpica skryła sie im na strom,
słoń chyciył strom i nagion mocno,
i jak ze szlojdra wystrzelył jom,
tak poleciała małpica w kosmos.
Biydoczka w lufcie leciała długo,
cug do stolice odjyżdżoł prawie,
toż spadła prosto na wongel w cugu,
i teraz siedzi w zoo w Warszawie.
Komentarze (3)
No tak. Jakieś 490 sztuk, myślę.
Ale się teraz rozlizą po całej Polsce i dalej psocić
po swojemu!
ha..ja..ha.. czemu i ja mam wrażenie że wszystkie
psotne małpy ze wszystkich polskich ogrodów tam
trafiły.. ??.. hi..hi..
Świetny wiersz! Wprawił mnie w doskonały humor i
przeznaczony jest nie tylko dla dzieci, prawda?!