Maskynbal, czyli zebra

Już od downa w karnawale
Robiyło sie śmiyszne wice,
Tóż muzyka z maskynbalym
Miały zwierzynta w Afryce.

Kómbinuje kożdy, myśli,
Czym drugigo sam zaskoczyć,
Jak sie oblyc, co wymyśleć,
Abo, co drugimu spsocić.

Żyrafa już mo plan piyrszy:
Plyjt prziciepła se na pleca,
A pod spodkiym pukel styrczy.
Już żech je kamela przeca.

W co inkszego sie zabawiył
Stary wicman, hipopotam,
Bo ón skrzidła se prziprawiył
I udowoł szmaterloka.

Muzykantym bydzie słóń,
Zagro walca na wesoło,
Inkszy plan mo czorny kóń -
Przemaluje sie na bioło.

Siedzi kóń i farba miyszo,
Naszykowoł se do biksów,
Dyć małpice były blisko,
Óne wica robióm dycko.

Klacz maluje wartko kónia,
Synek przi tym ji pómogo,
Piyrsze jedna, drugo stróna,
A na kóńcu łeb i ogón.

Tańcuje zwierzónt korowód,
W roztomańtych klajdach, maskach,
W świycidełkach, kolorowo.
Twało by tak do terazka...

Ale, jak to dycko bywo,
Jak zabawa two w najlepsze,
Naroz sie fest zamroczyło
I lunyło letnim deszczym.

Wszyscy sie pod strómy skryli,
Czekali aż deszcz sie skóńczy
I choć mokrzi trocha byli,
Za chwila zaś było słóńce.

Oroz wszyscy sie dziwajóm,
Co sie to stało terazki?
Czegoś takigo niy znajóm -
Kóń sie zrobiył cały w paski.

A małpice, jak to óne,
Wica robióm wszystkim dycko,
Pyski majom roześmióne -
Namiyszały farby nitro.

Tak sie wyjaśniyło wszystko,
Co sie to kóniowi stało,
Trocha zmyło sie, jak dycko,
A trocha farby zostało.

I tak wtedy, przi cufalu,
Nowe zwierze tam poznali,
Królowóm maskynbalu
Wszyscy zebra obwołali.

Fojerman

maskynbal - bal maskowy plyjt - koc pukel - garb kamela - wielbłąd wicman - kawalarz szmaterlok - motyl biksy - puszki małpice - małpy klajdy - suknie strómy - drzewa cufal - przypadek

autor

stan09

Napisany: 2008-01-31 Dodano: 2008-02-01 09:26:17

Ten wiersz przeczytano 811 razy

Oddanych głosów: 2

Rodzaj Rymowany Klimat Wesoły Tematyka Dla dzieci

Aby zagłosować zaloguj się w serwisie