ŚLONSKI ŁOBIOD… czyli...

Łobiod musza rychtować
Pokoża wom jak jo piyknie umja gotować
Ale noprzód zopaska byda zakłodoł
Bych se galot niy poflekowoł

Terozki ida do kamerlika
Bo hań mom halba schowano kole stolika
Poleku zimnioki byda szkroboł,
Naleja se sznapsa…wiela wom niy byda godoł

Miynso na rolady już mom poczaskane
I zynftem rubo pomazane
Kożdy konsek niciami byda wionzoł
By mi w tyglu sie niy rozwionzoł

Biera sie do kronio modryj kapusty
(To niy z niyj mój dziób taki tusty)
Wciepia jom do boncloka
Umaszacza szpyrkom i na kachloka

Wszyjsko sie wartko warzi
Myśla, że żodne pieroństwo sie niy przidarzi
Jeronie to by dopiyro smrodu było
Musza dac pozor żeby sie cosik niy przipoliło

Doprowdy jo niy fulom
Piyndziesiont klusek zaroz ukulom
W tyj familiji same jedzoki
Przeca miyszkajom tukej yno chłopoki

Hned bydzie narychtowne
Bysztek, talyrze gryfnie poukłodane
Bioły serwet na tisz rozłoża
Blumwaza z kwiotkami położa

Prosza…yno niy cudujcie
Niy smakuje… to mie w rzić pocałujcie!!!

Zainteresowanych rozkodowaniem poszczególnych słów odsyłam: http://www.republika.pl/zedowice/slownik_io.html

autor

cubus

Napisany: 2006-10-20 Dodano: 2006-10-20 00:01:05

Ten wiersz przeczytano 1740 razy

Oddanych głosów: 30

Rodzaj Rymowany Klimat Radosny Tematyka Jedzenie

Aby zagłosować zaloguj się w serwisie