O ślimoku, gliździe a krecie

Na wyścigi

Roz ślimok, a glizda poszły tak o weta:
Kery z nich dwōch piyrszy zaleci na meta.
Ta poważno sprawa trza rozsōndzić przeca,
Bezto se na syndzie zawołali kreta.
Ślimok z glizdōm stojōm gotowi na starcie,
A kożdy chce ruszyć z miejsca, jak najwarciyj.
Kret im na poczōntek kiwnōł swojōm łapōm,
A sie tyn maratōn już na dobre zaczōn.
Z boku posiodały: myszy, bōnki, mrowce.
A jedyn szmaterlok siod se tyż na trowce.
Kret, syndzia wyścigu, musi widzieć wszystko,
Bezto se na gōrka siod, na kretowisko.
A ōni tak lecōm przed sia, wiela dychu,
A wcale im ni ma żodnymu do śmiychu.
Ślimok sie ślimaczy, kełże wiela umi,
Glizda sie naciōngo, a kurczy, jak gōmin.
A tam z boku larmo, bo uciecha majōm.
I ptoki na strōmach sie z wiyrchu dziwajōm.
Już je prawie kōniec, już brakuje siły,
Żodyn niy popuści, chce wyprōwać żyły.
Z boku keryś wrzeszczy:”glizda, glizda gazu!”
„Ślimok, ślimok, jeszcze!” A echo powtarzo.
Juz widać ta kryska, jeszcze ze dwa cole,
Dyćjedyn drugimu niy do wcale zwole.
Ślimok sie naciōngo, a wystawio rogi,
A glizda, jak fedra, jak piynć coli dłōgich.
Dopadli do mety, minyli łeb w łeb,
A tam przi kibicach aże wszystko wre.
Czekajōm na kreta, ciekawi, jak diosi,
Aż syndzia wyniki wyścigu ogłosi.
„Kto wygroł, kto piyrszy dolecioł do mety?”
A kret pado na to:„niy wiym, jo je ślepy.”

Wiersz dla dzieci w języku śląskim

autor

stan09

Napisany: 2012-03-01 Dodano: 2022-09-11 10:36:51

Ten wiersz przeczytano 1436 razy

Oddanych głosów: 12

Rodzaj Rymowany Klimat Wesoły Tematyka Dla dzieci

Aby zagłosować zaloguj się w serwisie