Sojka, stroka a kawka

Dzieciom po ślasku

Chciała roz jedna sojka do kupy ze strokōm
Bojka ôpedzieć inkszym ptokōm.
Tōż posiodali wszyscy radzi,
Na asty, na masty, kaj kery poradzi,
A słōchajōm.
I jedyn zajōnc
Pod miedzōm nastawio ucho
A słōcho.
Wszyscy cicho siedzōm.
Cōż im to ôpedzōm
Ta sojka ze strokōm?
A sojka zaczła tak:
- Bojka ta
Znōm ôd starzika,
Co siodali dycko na szpica
Na staro sośniczka,
A ze wielkōm grajfkōm,
W dziubie ze fajfkōm
Śpiywali pieśniczka.
A ô czym śpiywali?
Jutro pobojōm wōm dalij,
Bo dzisiej je żech zmochano.
Skōńczymy jutro rano,
Tōż wszystkich zaproszōm,
Jo, sojka, ze kamratkōm strokōm.
I ôdfurgały, stroka a sojka, do kawki,
Na lauba, napić sie kawki,.
Trefiōł zech ich roz prawie,
Tak klachać przi tej kawie,
Jak kawka po łepie sie klupie:
- Te ptoki sōm taki gupie,
A wierzōm, że im sojka,
Skōńczy kedy ta bojka.
A co sam robi ta stroka?
Poskrzeczy roz za czas trocha,
Bo ôna wiy ô tym mi sie zdo,
Że sojka tej bojki niy zno.

autor

stan09

Napisany: 2022-09-07 Dodano: 2022-09-10 13:59:35

Ten wiersz przeczytano 1152 razy

Oddanych głosów: 5

Rodzaj Rymowany Klimat Wesoły Tematyka Dla dzieci

Aby zagłosować zaloguj się w serwisie