Maluchym jadymy na wczasy

Jadymy maluchym na wczasy,
do DDRu, na Zachod.
Klamorow momy piynć taszy,
na bagażniku, na dachu.

Ze zadku dziecka siedzom,
baba kole mie, na zicu,
dyć niech somsiady wiedzom,
że nas na wczasy styko.

Baba mo nowo kecka,
jo brele ciymne, do szpasu,
niych sie radujom dziecka,
że mogom jechać na wczasy.

Sto marek we potmanyju,
niy trzeba nom przeca wiyncy,
bo momy termos tyju
i tasza biksow z miynsym.

Kupiymy se czekulady,
jak styknie, to po lodzie,
niych wiedzom tyż somsiady,
że nom sie fest powodzi.

A jak nazod wrocymy
ze wczasow, za dwa tydnie,
szporować zaś bydymy,
i żyć cały rok biydnie

Za rok zaś przidzie lato,
to biksow se kupiymy,
na Wyngry, nad Balaton,
maluchym pojadymy.

Jadymy se na wczasy,
maluchym, z całom rodzinom,
klamorow momy piynć taszy
i dwa kanistry z bynzinom.

autor

stan09

Napisany: 2007-03-25 Dodano: 2007-03-25 12:13:43

Ten wiersz przeczytano 651 razy

Oddanych głosów: 4

Rodzaj Rymowany Klimat Wesoły Tematyka Życie

Aby zagłosować zaloguj się w serwisie