Jak bych umioł

Jak bych umioł zdobyć skrzidła od skowronka,
poleciołbych zaroz dookoła Ślonska,
śpiywoł bych kożdymu, kogo yno spotkom,
pozdrowioł bych ludzi starom, ślonskom, godkom.

Wzion bych na ta rajza kożde małe dziecko,
i o ojcowiźnie opowiedzioł wszystko,
kim byli powstańce, a kim partyzanty,
kto to był Morcinek, a kery Korfanty.

Lecioł bych nad Rybnik, Chorzow i Piekary,
pokozoł bych Bytom i Raciborz stary,
lecioł bych nad gruby i nad familoki,
z wiyrchu bych pokozoł, jak żyjom Ślonzoki.

Jak bych nad hołdami tam wysoko lecioł,
to bych opowiadoł o Cia naszym dzieciom,
o powstańcach ślonskich, z Wujka o tragedii,
co w godzinie proby, za wolność polegli.

Tak bych chcioł polecieć i im porozprawiać,
o ślonskij tradycji, co z dziada pradziada
była przenoszono we ślonskij familii,
a na naszych oczach umiyro w tej chwili.

Czy by to, co wieki całe tu przetwało,
teraz, w naszych czasach, tak skończyć sie miało?
Chcioł bych tak polecieć, ale dyć niy moga,
toż tak kombinuja i trocha mi szkoda...

autor

stan09

Napisany: 2007-09-02 Dodano: 2007-09-04 10:16:20

Ten wiersz przeczytano 580 razy

Oddanych głosów: 10

Rodzaj Rymowany Klimat Obojętny Tematyka Życie

Aby zagłosować zaloguj się w serwisie